අටමස්ථානාධිපති පල්ලේගම හේමරතන හිමියන් සහ දැරියගේ මව අත්අඩංගුවට!

අටමස්ථානයේ ප්‍රධාන සංඝනායක, පල්ලේගම හේමරතන හිමියන් 15 හැවිරිදි දැරියක් ලිංගික අපයෝජනයට ලක් කළ බවට එල්ල වූ චෝදනා සම්බන්ධයෙන් අත්අඩංගුවට ගෙන තිබේ.

පොලීසිය සඳහන් කළේ, කොළඹ පිහිටි පුද්ගලික රෝහලක හදිසි ප්‍රතිකාර ඒකකයේ ප්‍රතිකාර ලබමින් සිටියදී උන්වහන්සේ අත්අඩංගුවට ගත් බවයි.

මීට පෙර අනුරාධපුර මහේස්ත්‍රාත් අධිකරණය විසින් පල්ලේගම හේමරතන හිමියන් සහ දැරියගේ මව අත්අඩංගුවට ගැනීම සඳහා වරෙන්තු නිකුත් කර තිබුණි.

එමෙන්ම, අනුරාධපුර ප්‍රධාන මහේස්ත්‍රාත් සියපත් සසිදු වික්‍රමරත්න මහතා විසින් උන්වහන්සේට විදේශ ගමන් තහනමක්ද පනවා ඇති බව වාර්තා වේ.

මෙම සිද්ධිය සම්බන්ධයෙන් මූලික පැමිණිල්ල 2026 මාර්තු 6 වනදා නිට්ටඹුව පොලීසිය වෙත ලැබී තිබූ අතර, එය මුලින් කුඩා දැරියක් පැහැරගෙන යාම සහ රඳවා තැබීම සම්බන්ධයෙන් වූ පැමිණිල්ලක් ලෙස සඳහන් වේ.

පසුව දැරියගෙන් ලබාගත් ප්‍රකාශවලදී පෙර සිටම සිදු වූ බව කියන ලිංගික අපයෝජන පිළිබඳ තොරතුරු අනාවරණය වී තිබේ.

මෙම සිද්ධියට අදාළව මේ වනවිට පුද්ගලයින් තිදෙනෙකු අත්අඩංගුවට ගෙන ඇති අතර, දැරියගේ මවද චෝදනා සඳහා අනුබල දීමේ සැකය මත අත්අඩංගුවට ගෙන ඇත.