"කිහිප දෙනෙකුගේ වැරදි නිසා මුළු මහත් භික්ෂු පරපුරටම දොස් කීම වැරදියි" ශාසනයේ ගෞරවය සුරැකීමට සෝභිත හිමියන්ගෙන් විශේෂ ප්‍රකාශයක්

ශාසනයේ ගෞරවය ආරක්ෂා කරගැනීම වෙනුවෙන් විනය විරෝධී ක්‍රියාවල නිරත වන පිරිස් තරාතිරම නොබලා සසුනෙන් ඉවත් කිරීමට පියවර ගත යුතු බව රාමඤ්ඤ මහා නිකායේ දක්ෂිණ ලංකාවේ ප්‍රධාන සංඝනායක අතිපූජ්‍ය ඕමල්පේ සෝභිත නාහිමියෝ පවසති.

ඊයේ පැවති මාධ්‍ය හමුවකදී අදහස් දක්වමින් උන්වහන්සේ අවධාරණය කළේ වර්තමාන ශාසනික ගැටලුවලට විසඳුම් සෙවීම සඳහා වහාම ධර්ම සංගායනාවක අවශ්‍යතාවය පවතින බවයි.

සංඝාධිකරණයට නීතිමය බලය: සංඝාධිකරණය මගින් ගනු ලබන තීරණ බලාත්මක කිරීම සඳහා අවශ්‍ය රාජ්‍ය අනුග්‍රහය හා නීතිමය ශක්තිය ලබා ගැනීමට මහා නායක හිමිවරුන් කඩිනමින් මැදිහත් විය යුතු බව උන්වහන්සේ පෙන්වා දෙති.

පසුගිය දිනවල වාර්තා වූ ඇතැම් අවාසනාවන්ත සිදුවීම් මුල් කරගනිමින් මුළු මහත් භික්ෂු පරපුරටම චෝදනා එල්ල කිරීම වැරදි සහගත බව සෝභිත හිමියෝ පැවසූහ.

කිහිප දෙනෙකු කරන වැරදි නිසා සමස්ත ශාසනයම විවේචනයට ලක් නොකළ යුතු බව උන්වහන්සේගේ අදහසයි.

මහා නායක හිමිවරුන් විසින් මීට අදාළ යෝජනා මාලාවක් රජය වෙත දැනටමත් ඉදිරිපත් කර ඇති බැවින්, දැන් කළ යුත්තේ එම යෝජනා ප්‍රායෝගිකව ක්‍රියාත්මක කර වැරදිකරුවන්ට එරෙහිව ධර්මානුකූලව පියවර ගැනීම බව නාහිමියෝ වැඩිදුරටත් සඳහන් කළහ.