දිවයිනේ ප්‍රදේශ කිහිපයකට ප්‍රබල අකුණු අනතුරු ඇඟවීම්

දිවයිනේ පළාත් සහ දිස්ත්‍රික්ක කිහිපයකට අද (26) දිනයේදී ප්‍රබල අකුණු සහ ගිගුරුම් සහිත වැසි ඇති විය හැකි බව කාලගුණවිද්‍යා දෙපාර්තමේන්තුව විසින් ප්‍රකාශයට පත් කරන ලද නවතම අවවාදාත්මක නිවේදනයක සඳහන් වේ.

කාලගුණ වාර්තාවලට අනුව, අද පස්වරු 2.00 න් පමණ පසුව පහත සඳහන් ප්‍රදේශවලට ගිගුරුම් සහිත වැසි සමඟ ප්‍රබල අකුණු ඇතිවීමේ වැඩි සම්භාවිතාවක් පවතී.

පළාත් - බස්නාහිර සහ සබරගමුව.

දිස්ත්‍රික්ක - ගාල්ල, මාතර, මහනුවර, නුවරඑළිය සහ කුරුණෑගල.

වැසි පවතින අවස්ථාවලදී එම ප්‍රදේශවල තාවකාලිකව තද සුළං තත්ත්වයක් ද ඇති විය හැකි බව දෙපාර්තමේන්තුව පෙන්වා දෙයි.

අකුණු මඟින් සිදුවිය හැකි ජීවිත හා දේපළ හානි අවම කර ගැනීම සඳහා උපරිම පූර්ව ආරක්ෂිත පියවර අනුගමනය කරන ලෙස කාලගුණවිද්‍යා දෙපාර්තමේන්තුව ජනතාවගෙන් විශේෂ ඉල්ලීමක් කරයි.

අකුණු අනතුරුවලින් මිදීමට උපදෙස්,

විවෘත ස්ථානවල හෝ ගස් යට රැඳී සිටීමෙන් වළකින්න.
කුඹුරු, තේ වතු හෝ ජලාශ ආශ්‍රිතව රැඳී සිටීමෙන් වළකින්න.
විදුලි උපකරණ භාවිතයෙන් බැහැර වන්න.
පොදු ප්‍රවාහන හෝ ආවරණය වූ වාහන තුළ රැඳී සිටින්න.