පොහොර මිල ඉහළ යාමේ ලකුණු!

මෙරටට ආනයනය කිරීමට නියමිත ඉදිරි පොහොර තොග සඳහා වැය කර ඇති පිරිවැය ඉහළ යාම හේතුවෙන්, ඉදිරි කාලසීමාව තුළ වෙළඳපොළේ පොහොර මිලෙහි සංශෝධනයක් (ඉහළ යාමක්) සිදුවිය හැකි බව නියෝජ්‍ය අමාත්‍ය නාමල් කරුණාරත්න මහතා පවසයි.

පොල්පිතිගම, රඹේ ගොවිජන මධ්‍යස්ථානයේ ඊයේ (02) පස්වරුවේ සිදුකළ නිරීක්ෂණ චාරිකාවකින් අනතුරුව නිලධාරීන් සමඟ පැවති සුහද සාකච්ඡාවකදී ඔහු මේ බව අවධාරණය කළේය.

නියෝජ්‍ය අමාත්‍යවරයා පෙන්වා දෙන පරිදි මෙම මිල ඉහළ යාමට බලපා ඇති ප්‍රධාන කරුණු මෙසේය,

දැනටමත් ඇණවුම් කර ඇති පොහොර තොග සඳහා පෙර ගෙවන ලද මුදල සාපේක්ෂව ඉහළ අගයක පැවතීම.
ලෝක වෙළඳපොළේ හෝ පවතින ගිවිසුම්ගත මිල ගණන් අනුව රජයට දැරීමට සිදුවූ පිරිවැය ඉහළ යාම.

මෙම තත්ත්වය හමුවේ ගොවි ජනතාව මුහුණ දෙන ගැටලු පිළිබඳවද මෙහිදී අවධානය යොමු වූ අතර, පවතින තත්ත්වයන් කළමනාකරණය කරමින් ඉදිරි කටයුතු සිදුකරන ආකාරය පිළිබඳව ඔහු නිලධාරීන් සමඟ අදහස් හුවමාරු කර ගත්තේය.