අග්‍රාමාත්‍ය හරිනි අමරසූරිය එක්සත් රාජධානිය බලා පිටත් වේ!

22 වැනි වාර්ෂික පොදුරාජ්‍ය මණ්ඩලයීය අධ්‍යාපන සමුළුවට (22nd Annual Commonwealth Education Forum) සහභාගී වීම සඳහා අග්‍රාමාත්‍ය ආචාර්ය හරිනි අමරසූරිය මහත්මිය අද (18) දිවයිනෙන් පිටත්ව ගියාය.

කටුනායක බණ්ඩාරනායක ජාත්‍යන්තර ගුවන් තොටුපළින් එක්සත් රාජධානිය බලා පිටත්ව ගිය අග්‍රාමාත්‍යවරිය, මෙම සංචාරයේදී අධ්‍යාපන සමුළුවට අමතරව 2026 පොදුරාජ්‍ය මණ්ඩලයීය විවෘත ඉගෙනුම් ආයතනයේ (COL) පාලක මණ්ඩල රැස්වීමට ද සහභාගී වීමට නියමිතය.

මෙම නිල සංචාරය අතරතුර අග්‍රාමාත්‍යවරිය බ්‍රිතාන්‍යයේ ඉහළ පෙළේ නියෝජිතයන් කිහිපදෙනෙකුම හමුවී ද්විපාර්ශ්වික සාකච්ඡා පැවැත්වීමට සැලසුම් කර ඇත.
ඒ අනුව,

බ්‍රිතාන්‍ය අධ්‍යාපන ලේකම් (අමාත්‍ය) බ්‍රිජට් පිලිප්සන් (Bridget Phillipson) මහත්මිය හමුවී අධ්‍යාපන ක්ෂේත්‍රයේ සහයෝගීතාව පිළිබඳව සාකච්ඡා කරනු ඇත.
බ්‍රිතාන්‍ය විදේශ ලේකම් (අමාත්‍ය) ඉවෙට් කූපර් (Yvette Cooper) මහත්මිය සමඟ ශ්‍රී ලංකාව සහ බ්‍රිතාන්‍යය අතර පවතින සබඳතා ශක්තිමත් කර ගැනීම පිළිබඳව විශේෂ සාකච්ඡාවක් පැවැත්වීමට නියමිතය.
පොදුරාජ්‍ය මණ්ඩලයීය ලේකම් ජනරාල් ෂර්ලි අයෝර්කර් බොච්වේ (Shirley Ayorkor Botchwey) මහත්මිය ද හමුවීමට අග්‍රාමාත්‍යවරිය අපේක්ෂා කරයි.

අග්‍රාමාත්‍යවරිය සිය සංචාරය තුළදී සසෙක්ස් විශ්වවිද්‍යාලයේ (University of Sussex) සංවර්ධන අධ්‍යයන ආයතනයේ (IDS) 60 වැනි සංවත්සර උත්සවයට විශේෂ ආරාධිතයෙකු ලෙස එක්වනු ඇත.

මීට අමතරව, ලොව සුප්‍රකට ඔක්ස්ෆර්ඩ් විශ්වවිද්‍යාලයේ (University of Oxford) ගෝලීය හා කලාපීය අධ්‍යයන අංශය ඇමතීමට ද අග්‍රාමාත්‍යවරියට අවස්ථාව හිමිව තිබේ.

එහිදී ඇය එරට විද්වතුන් සහ සිසුන් සමඟ පවත්වන ප්‍රශ්නෝත්තර සැසියකට ද දායක වීමට නියමිතය.

අධ්‍යාපන, පර්යේෂණ සහ ප්‍රතිපත්ති සම්පාදනය යන අංශවලින් ජාත්‍යන්තර සහයෝගීතාව වර්ධනය කර ගැනීම මෙම සංචාරයේ ප්‍රධාන අරමුණක් වන අතර, එමඟින් පොදුරාජ්‍ය මණ්ඩලයීය රටවල් සමඟ ශ්‍රී ලංකාව පවත්වන සබඳතා තවදුරටත් පුළුල් වනු ඇතැයි අපේක්ෂා කෙරේ.