විපක්ෂ නායක කාර්යාලයේ පැවැති හදිසි හමුවේදී සජිත් කියපු කතාව! "ඊළඟ ඡන්දෙදි මේ වැරදි ක්‍රමවේදයට තිත තියන්න ඕනේ"

වත්මන් ශ්‍රී ලංකාව තුළ අද වන විට නිර්මාණය වී ඇත්තේ රටේ සමස්ත මහජනතාව අතරට යෑමට පවා දැඩි බියකින් පසුවන ජනාධිපතිවරයෙක් සහ බියගුළු, නිවට ආණ්ඩුවක් බව විපක්ෂ නායක සජිත් ප්‍රේමදාස මහතා පවසයි.

පළාත් සභා මැතිවරණය පැවැත්වීමට වත්මන් පාලනය විසින් අඛණ්ඩව මැළිකමක් දැක්වීම තුළින්ම ඔවුන්ගේ පවතින මෙම බියගුළුභාවය සහ නිවටභාවය මනාව ඉස්මතු වන බව විපක්ෂ නායකවරයා පෙන්වා දෙයි.

විපක්ෂ නායක සජිත් ප්‍රේමදාස මහතා මේ බව කියා සිටියේ ‘පළාත් සභා කල් දමන බියගුළු අනුරගේ වියරුව පරදවමු’ යන විශේෂ තේමාව පෙරදැරි කරගනිමින්, හිටපු පළාත් සභා මන්ත්‍රීවරුන් කණ්ඩායමක් සමඟ විපක්ෂ නායක කාර්යාලයේදී පැවැති විශේෂ හමුවක් අමතමිනි.

මෙහිදී වැඩිදුරටත් අදහස් දැක්වූ ප්‍රේමදාස මහතා සඳහන් කළේ, රටේ සමස්ත ජනතාව මේ වන විට තමන්ගේ නිල ඡන්ද බලය (හඬ) තුළින් සමස්ත දේශයම අවදි කිරීමට පූර්ණ සූදානමකින් පසුවන බවයි.

ඒ සඳහා වත්මන් සමාජය තුළ පවතින හොඳම සහ එකම විධිමත් ක්‍රමය වන්නේ වහාම පළාත් සභා මැතිවරණය පැවැත්වීම බව ද හෙතෙම අවධාරණය කළේය.

වත්මන් ජනාධිපතිවරයා සහ ඔහුගේ රජය මහජනතාවට කුමක් වුවත් තමන්ගේ හිතුමතයට අනුව පමණක් කටයුතු කරන බැවින්, ජනතාව මුහුණ දෙන පීඩනය, අසහනය, දුක, වේදනාව සහ කණගාටුවට නිසි ප්‍රතිචාර දැක්වීම උදෙසා පාලකයන්ට හොඳ පාඩමක් ඉගැන්වීමට පොදු මහජනතාව සූදානමින් සිටින බව ද විපක්ෂ නායකවරයා මෙහිදී කියා සිටියේය.

"බල උන්මාදයෙන් පිස්සු වැටෙන ක්‍රමයට තිත තැබිය යුතුයි"
රටේ ජනතාව මින් පෙර අවස්ථාවලදී ලැබූ අත්දැකීම්වලින් දැන්වත් නිසි පාඩම් ඉගෙන ගත යුතු බව විපක්ෂ නායකවරයා පෙන්වා දෙයි.

ඉදිරියට පැමිණෙන ආණ්ඩුවල දේශපාලන රැල්ලට හසු වී සිතීමකින් තොරව ඡන්දය ලබාදීම වෙනුවට, යම්කිසි දේශපාලන පාර්ශ්වයක් ජයග්‍රහණය කරවීමට අවශ්‍ය නම් සාධාරණ සූත්‍රයක් සහ දැක්මක් ඇති පිරිසකට පමණක් රට පාලනය කිරීමේ වරම ලබා දිය යුතු බව ඔහු පවසයි.

"එසේ නොමැති වූ විට සිදුවන්නේ පාලකයන් සීමාවකින් තොර අසීමිත බලයක් අතට ගෙන, බල උන්මාදයෙන් පිස්සු වැටී මුළු රටම ව්‍යාකූලත්වයට හා අවුලට පත් කිරීමයි. ඔවුන් තමන් ගැන පමණක් සිතා වැරදි තීන්දු තීරණ ගන්නා රටාවක් රට තුළ නිර්මාණය කරනවා.

ඒ නිසා එළඹෙන ඊළඟ මැතිවරණයේදී හෝ මෙම වැරදි සහගත දේශපාලන ක්‍රමවේදයට ජනතාව සදහටම තිත තැබිය යුතුයි."