පාස්කු ප්රහාරයට සති 3කට කලින් වුණු දේ ඇමැතිවරයා හෙළි කරයි! සුරේෂ් සලේ මෙහෙයවූ "සංවේදී දත්ත රැස් කිරීමේ" සැඟවුණු පැත්ත
10 Jun 2026, 5:07 PM |
Politics |
Views: 28
පාස්කු ඉරුදින එල්ල වූ මරාගෙන මැරෙන ත්රස්ත ප්රහාරයට රාජ්ය බුද්ධි සේවයේ හිටපු ප්රධානී තුවාන් සුරේෂ් සලේ මහතා කුමන්ත්රණකාරී ලෙස ඍජුවම සම්බන්ධ වී ඇති බවත්, ඒ සඳහා ඔහු විසින් ඉස්ලාම් අන්තවාදීන් මෙහෙයවා ඇති බවට විමර්ශනවලදී ඉතා පැහැදිලි තොරතුරු අනාවරණය වී ඇති බවත් මහජන ආරක්ෂක සහ පාර්ලිමේන්තු කටයුතු අමාත්ය ආනන්ද විජේපාල මහතා අද (10) පාර්ලිමේන්තුවේදී විශේෂ ප්රකාශයක් කරමින් අවධාරණය කළේය.
අමාත්යාංශ නිවේදන ඉදිරිපත් කිරීමේ අවස්ථාව යටතේ සභාව අමතමින් අමාත්යවරයා මේ බව කියා සිටියේය.
අමාත්යවරයා පාර්ලිමේන්තුවේදී හෙළි කළ සුවිශේෂීම කරුණ වූයේ, පාස්කු ඉරුදින ම්ලේච්ඡ ප්රහාරය එල්ල වීමට සති තුනකට (03) පෙර සුරේෂ් සලේ මහතා විසින් විශේෂ මුස්ලිම් පිරිසක් මීගමුව ප්රදේශයේ පිහිටි කතෝලික දේවස්ථාන (Churches) වෙත රහසිගතව යොමු කර ඇති බවයි.
එලෙස යොමු කළ පිරිස ලවා එම දේවස්ථානවල රැඳී සිටින පුද්ගල සංඛ්යාවන් මෙන්ම වන්දනාකරුවන් පැමිණෙන වේලාවන් ඇතුළු අතිශය සංවේදී තොරතුරු (Sensitive Information) රැස් කිරීමට සලේ මහතා කටයුතු කර ඇති බව ද විමර්ශන උපුටා දක්වමින් අමාත්යවරයා ප්රකාශ කළේය.
තවද, මෙම මහා විනාශය සිදුවීමට පෙර එක්තරා බුද්ධි තොරතුරුකරුවකු විසින් ප්රහාරය සම්බන්ධයෙන් යුද හමුදා බුද්ධි අංශය (Military Intelligence) කල්තියාම නිවැරදිව දැනුවත් කර තිබූ බවත්, එසේ තිබියදීත් වගකිවයුතු අංශ ඒ පිළිබඳව කිසිදු පූර්ව ආරක්ෂිත ක්රියාමාර්ගයක් ගෙන නොතිබූ බවත් අමාත්යවරයා සභාගැබේදී හෙළිදරව් කළේය.
මීට අමතරව, ස්විට්සර්ලන්තයේ දේශපාලන රැකවරණ ලත් අසාත් මවුලානා නමැත්තා ද බ්රිතාන්යයේ සුප්රකට "චැනල් ෆෝ" (Channel 4) රූපවාහිනී නාලිකාව සමඟ විශේෂ සම්මුඛ සාකච්ඡාවකට එක්වෙමින්, මෙම පාස්කු ප්රහාරයේ සැලසුම්කරණයට සහ කුමන්ත්රණයට සුරේෂ් සලේ මහතා සෘජුවම සම්බන්ධ බවට ලෝකය හමුවේ ප්රකාශ කර ඇති බව ද ඔහු මතක් කර දුන්නේය.
අවසාන වශයෙන් අමාත්ය ආනන්ද විජේපාල මහතා විපක්ෂයේ කණ්ඩායම් වෙත දැඩි අනතුරු ඇඟවීමක් කරමින් කියා සිටියේ, කොළඹ කොටුව ඇතුළු ප්රදේශවල දැනට දේශපාලන උවමනාවන් මත කෙරෙන සත්යග්රහ හෝ උපවාස ව්යාපාර දෙස බලා වත්මන් රජය කිසිසේත්ම පසුබට නොවන බවයි.
කවුරුන් කුමන ආකාරයේ සත්යග්රහ උපවාස කළ ද, දහස් ගණනක් අහිංසක වැසියන්ගේ ජීවිත බිලිගත් පාස්කු ප්රහාරයේ සැබෑ සුලමුල සෙවීමේ මෙම විශේෂ විමර්ශන කටයුතු කිසිදු බලපෑමක් මත නතර නොකරන බවත්, වරදකරුවන්ට නීතිය ක්රියාත්මක කරන බවත් අමාත්යවරයා වැඩිදුරටත් අවධාරණය කළේය.
