"වැඩි මිලට ගත්ත තොග තවම ඉවර නෑ" - ඇමති අනිල් ජයන්ත හේතු පැහැදිලි කරයි

වත්මන් ලෝක වෙළෙඳපොළේ බොරතෙල් ඇතුළු ඉන්ධන මිල ගණන් සැලකිය යුතු ලෙස පහළ ගොස් තිබුණද, එම මිල ගණන්වලට සමගාමීව මෙරට පවතින ඉන්ධන මිල වහාම පහළ දැමීමට දැනට කිසිදු හැකියාවක් නොමැති බව කම්කරු අමාත්‍ය සහ මුදල් හා ක්‍රමසම්පාදන නියෝජ්‍ය අමාත්‍ය ආචාර්ය අනිල් ජයන්ත මහතා නිල වශයෙන් ප්‍රකාශ කර සිටියි.

රටේ වත්මන් මූල්‍ය හා ආර්ථික තත්ත්වය පිළිබඳව මාධ්‍ය සහ ජනතාව දැනුවත් කිරීම සඳහා රජයේ ප්‍රවෘත්ති දෙපාර්තමේන්තු ශ්‍රවණාගාරයේදී අද (17) දහවල් පැවැත්වුණු විශේෂ මාධ්‍ය සාකච්ඡාවකදී අදහස් දක්වමින් අමාත්‍යවරයා මේ බව පැහැදිලි කළේය.

එහිදී පවතින තාක්ෂණික හේතු විස්තර කළ නියෝජ්‍ය අමාත්‍යවරයා කියා සිටියේ, වර්තමානයේ මෙරට පොදු මහජනතාව පරිභෝජනය කරමින් පවතින්නේ මීට පෙර අවස්ථාවලදී ජාත්‍යන්තර වෙළෙඳපොළෙන් ඉතා ඉහළ මිලකට මිල දී ගෙන ගබඩා කර තිබූ ඉන්ධන තොග බවයි.

එම නිසා, එම ඉහළ මිල ගණන් යටතේ මෙරටට ආනයනය කරන ලද පවතින ඉන්ධන තොග සම්පූර්ණයෙන්ම පරිභෝජනය කර අවසන් වන තුරු, දේශීය වෙළෙඳපොළේ ඉන්ධන මිල පහත දැමීමට රජයට මූල්‍යමය වශයෙන් හැකියාවක් නොමැති බව ඒ මහතා අවධාරණය කළේය.

කෙසේ වුවද, වැඩි මිල ගණන්වලට ආනයනය කර ඇති මෙම පවතින ඉන්ධන තොග ජනතාව භාවිත කර අවසන් වූ සැනින්, ලෝක වෙළෙඳපොළේ පවතින සහනදායී මිල ගණන්වලට අනුකූලව නව මිල සංශෝධනයක් සම්බන්ධයෙන් අවසන් තීරණයක් ගැනීමට රජයට හැකි වන බව ද ඒ මහතා වැඩිදුරටත් පැවසීය.

ලංකා ඛනිජ තෙල් නීතිගත සංස්ථාව විසින් අවසන් වරට ඇණවුම් කරන ලද පෙට්‍රල් සහ ඩීසල් මිල ගණන් පදනම් කරගනිමින් ඉදිරි කාලසීමාවේදී මිල අඩු කිරීමක් බලාපොරොත්තු විය හැකිදැයි මාධ්‍යවේදීන් නැඟූ සෘජු ප්‍රශ්නයකට පිළිතුරු දුන් අමාත්‍යවරයා මෙසේ ද සඳහන් කළේය;

"අපිට ඉදිරි දිනවලදී පරිභෝජනය සඳහා වෙළෙඳපොළට එන්න තියෙන්නේ කලින් මාසවල අපි ඇණවුම් කරලා ගත්ත ඉන්ධන තොගයි. ඒ අනුව තමයි වත්මන් මිල තීරණය වෙන්නේ. ඉදිරියටත් අපිට පරිභෝජනය කරන්න වෙන්නේ අපි වැඩි මිලට ගත්ත ඒවා ටිකක්.

ලෝක වෙළෙඳපොළේ පවතින අඩු මිලේ ඉන්ධන තොග අපිට මෙරටට ලබාගන්න වෙන්නේ ඉදිරි අනාගතයේදීයි. ඒ සඳහා යම් නිශ්චිත කාල පමාවක් (Time lag) සිදුවීම සාමාන්‍ය දෙයක්. නමුත් රජයක් විදිහට අපි උපරිමයෙන් බලාපොරොත්තු වෙනවා ඉදිරියේදී මිල අඩු වේවි කියලා.

ඒ අනුව, මේ දැන් ජනතාව වෙනුවෙන් ලබා දී තිබෙන සහනය අපිට අයින් නොකර, දැනට පවතින මිලේම පවත්වා ගැනීම හෝ ඉදිරියේදී මිල තවත් අඩු කිරීම පිළිබඳව රජය ඉතා සාධනීය ලෙස සලකා බලනවා."