වාහන බද්දෙන් අපේ කොන්දේසි කැඩිලා.. වහා ඉවත් කරන්න..- IMF ලංකාවට දන්වයි

ශ්‍රී ලංකාව වාහන ආනයනයේදී පනවා ඇති සියයට 50ක අධිභාරය, ජාත්‍යන්තර මූල්‍ය අරමුදල (IMF) සමඟ ඇති කරගත් එකඟතාවන් සහ කැපවීම් උල්ලංඝනය කිරීමක් බව එම අරමුදල පවසයි.
ජාත්‍යන්තර මූල්‍ය අරමුදලේ මෙරට මෙහෙයුම් ප්‍රධානී එමන් පැපජෝර්ජියෝ මහතා මාධ්‍ය හමුවකදී මේ බව අනාවරණය කළේය.

රජය විසින් මෑතකදී හඳුන්වා දුන් මෙම බදු සංශෝධනය මූල්‍ය අරමුදලේ වැඩසටහන යටතේ ශ්‍රී ලංකාව ලබා දී ඇති පොරොන්දු කඩකිරීමක් ලෙස හඳුනාගෙන ඇති බව ඒ මහතා පෙන්වා දුන්නේය.

කෙසේ වෙතත්, මෙම අධිභාරය මාස තුනක කාලයකට පමණක් සීමා වනු ඇතැයි මූල්‍ය අරමුදල විශ්වාසය පළ කරයි. ඒ අනුව, මෙම සියයට 50ක අතිරේක බද්ද යළි ඉවත් කරනු ඇතැයි අපේක්ෂා කරන බව ද පැපජෝර්ජියෝ මහතා වැඩිදුරටත් සඳහන් කළේය.

ජාත්‍යන්තර මූල්‍ය අරමුදලේ ආධාර වැඩසටහන යටතේ ආනයන සීමා පැනවීම හෝ මෙවැනි අධික බදු අය කිරීම් දිරිමත් නොකරන බවත්, නිදහස් වෙළඳ ප්‍රතිපත්තියක් පවත්වාගෙන යාම රටේ ආර්ථික ස්ථාවරත්වයට වැදගත් බවත් මෙහිදී අවධාරණය කෙරිණි.