මහජන බැංකුවෙන් විශේෂ නිවේදනයක්!

2026 මැයි 17 වැනිදා පෙ.ව. 2.53ට ප්‍රකාශයට පත් කරන ලද මෙම වාර්තාවට අනුව, මහජන බැංකුව පවසන්නේ තම විදේශ ප්‍රේෂණ පද්ධතිවලින් එකක විනිමය අනුපාත යෙදවීමේ දෝෂයක් හේතුවෙන්, වසර තුනකට ආසන්න කාලයක් තුළ ඇතැම් ගනුදෙනුකරුවන්ට අතිරික්ත මුදල් ගෙවීම් සිදුව ඇති බවයි.

එමඟින් බැංකුවට සිදුව ඇති මූල්‍ය බලපෑම රුපියල් මිලියන 656ක් පමණ වන බව ද බැංකුව සඳහන් කරයි.

බැංකුව නිකුත් කළ නිවේදනයට අනුව, මෙම ගැටලුව විශේෂිත විදේශ ප්‍රේෂණ පද්ධතියක එක් විදේශ මුදල් ඒකකයකට අදාල විනිමය අනුපාත යෙදවීමේ දෝෂයක් සම්බන්ධ වූ අතර, 2023 මැයි සිට 2026 මාර්තු දක්වා සිදු වූ ගනුදෙනු මෙම දෝෂයෙන් බලපෑමට ලක්ව ඇත.

මෙම දෝෂය මෑතකදී හඳුනාගෙන ඇති අතර, එය මේ වනවිට සම්පූර්ණයෙන්ම නිවැරදි කර ඇති බව මහජන බැංකුව ප්‍රකාශ කළේය.

මෙම සිදුවීම අනාවරණය වීමෙන් අනතුරුව, බැංකුව අභ්‍යන්තර සමාලෝචනයක් ආරම්භ කර ඇති අතර, මෙහෙයුම් පාලන ක්‍රම තවදුරටත් ශක්තිමත් කරමින්, ශ්‍රී ලංකා මහ බැංකුව ඇතුළු නියාමන සහ අධීක්ෂණ ආයතන සමඟ සාකච්ඡා කරමින් සිටින බව ද සඳහන් කළේය.

බැංකුවට අනුව, රුපියල් මිලියන 656ක ඇස්තමේන්තුගත අලාභය මේ වනවිටත් එහි මූල්‍ය ප්‍රකාශන තුළ සම්පූර්ණයෙන්ම ගණන්ගත කර ඇති අතර, තවත් අමතර මූල්‍ය බලපෑමක් අපේක්ෂා නොකරන බව ද ප්‍රකාශ කර ඇත.

එසේම, බලපෑමට ලක් වූ ගනුදෙනු සම්බන්ධයෙන් මුදල් ආපසු අයකර ගැනීමේ ක්‍රියාවලිය ද ආරම්භ කර ඇති අතර, අදාල ගනුදෙනුකරුවන්ගෙන් මුදල් ආපසු ලබා ගැනීමේ කටයුතු වල යම් ප්‍රගතියක් ද මේ වනවිට ලබා ඇති බව මහජන බැංකුව පැවසීය.

තවද, මෙම සිදුවීම බැංකුවේ දෛනික මෙහෙයුම්, ඩිජිටල් සේවා හෝ තැන්පතු කටයුතු කෙරෙහි කිසිදු බලපෑමක් ඇති නොකරන බවත්, බැංකුවේ සමස්ත මූල්‍ය ස්ථාවරත්වයට මෙය සැලකිය යුතු බලපෑමක් නොවන බවත් ගනුදෙනුකරුවන්ට මහජන බැංකුව සහතික විය.

එහි වත්කම් පදනම රුපියල් ට්‍රිලියන 3.8ක් පමණ වන බව ද බැංකුව පෙන්වා දුන්නේය.