ඉන්ධන මිල තීරණය සහ සැපයුම් තත්ත්වය පිළිබඳ යාවත්කාලීන කිරීම්

ලෝක වෙළෙඳපොළේ පවතින ඉන්ධන මිල ගණන් සැලකිල්ලට ගනිමින් මෙරට ඉන්ධන මිල යළි සංශෝධනය කිරීමේදී, මිල අඩුවීමක් බලාපොරොත්තු විය නොහැකි බව ඛනිජ තෙල් නීතිගත සංස්ථාවේ කළමනාකාර අධ්‍යක්ෂ මයුර නෙත්තිකුමාර මහතා පවසයි.

ඒ මහතා පෙන්වා දෙන්නේ, පසුගිය මාර්තු සහ අප්‍රේල් මාසවලට සාපේක්ෂව වත්මන් මිල ගණන්වල යම් පහළ යාමක් දක්නට ලැබුණද, මැදපෙරදිග යුද ගැටුම් ආරම්භ වීමට පෙර පැවති මිල මට්ටමට වඩා තවමත් ගෝලීය ඉන්ධන මිල ඉහළ අගයක පවතින බවයි.

මෙම තත්ත්වය සම්බන්ධයෙන් අදහස් දැක්වූ කළමනාකාර අධ්‍යක්ෂවරයා වැඩිදුරටත් සඳහන් කළේ, අද (29) දින ජාත්‍යන්තර වෙළෙඳපොළේ ඉන්ධන මිල ප්‍රකාශයට පත් කිරීමෙන් අනතුරුව, ඒ පිළිබඳව අධ්‍යයනය කර සාකච්ඡා වට කිහිපයකින් පසු මෙරට මිල ගණන් පිළිබඳව තීරණයක් ගනු ඇති බවයි.

කෙසේ වෙතත්, ඉන්ධන මිලෙහි සුළු වැඩිවීමක් සිදු වේද නැතහොත් පවතින මිලටම තවදුරටත් පවත්වාගෙන යන්නේද යන්න මෙතෙක් තීරණය කර නොමැති බවත්, විශාල මිල වැඩිවීමක් සිදු නොවනු ඇති බවත් ඔහු අවධාරණය කළේය.

මේ අතර, මෙරට ඉන්ධන සැපයුම පිළිබඳව කරුණු දක්වමින් ඔහු සඳහන් කළේ, ඊයේ (28) දිනයේදී බොරතෙල් මෙට්‍රික් ටොන් 89,000ක් රැගත් නෞකාවක් දිවයිනට ළඟා වූ බවයි.

එමෙන්ම, එළඹෙන 31 වැනි දින තවත් බොරතෙල් නෞකාවක් (මර්බන් වර්ගයේ) මෙට්‍රික් ටොන් 95,000ක තොගයක් සමඟ දිවයිනට පැමිණීමට නියමිතය. මෙම තත්ත්වය හමුවේ ඉන්ධන සම්බන්ධයෙන් කිසිදු අනියත බියක් ඇති කර නොගන්නා ලෙස ද ඔහු ජනතාවගෙන් ඉල්ලා සිටියි.

අඛණ්ඩ ඉන්ධන සැපයුම සහ මිල තීරණ ගැන කළමනාකාර අධ්‍යක්ෂ මයුර නෙත්තිකුමාර මහතාගේ අදහස්,

"4 වැනි මාසය සහ 3 වැනි මාසය වෙද්දි ලෝක වෙළෙඳපොළේ තිබුණා ඉතාම ඉහළ මිලක්. නමුත් මේ මිල මේ වෙනකොට පහළ මට්ටමකට ඇවිත් තියෙනවා. නමුත් අපි ගත්තොත් යුද්ධය ආරම්භයට පෙර තිබුණ මිලට වැඩිය වැඩි මිලක තමයි තාමත් ලෝක වෙළෙඳපොළේ මිල තියෙන්නේ. ඒ නිසා පැහැදිලිව කියන්න පුළුවන් මිල අඩුවීමක් වෙන්නේ නම් නෑ කිසිසේත්ම. මේ මාසයේ හෝ ඊළඟ මාසයේ... බොහෝ දුරට සැප්තැම්බර් වෙනකන් මිලේ අඩුවීමක් නම් බලාපොරොත්තු වෙන්න බෑ. නමුත් වැඩි වීමක් තියෙනවාද කියන එක මේ වෙනකොට අපිට කියන්න පුළුවන් කමක් නෑ. අපි ඒක මේ වෙනකොටත් අධ්‍යනය කරමින් ඉන්නේ. අද හවස් වෙද්දි තමයි ජාත්‍යන්තර මිල ප්‍රකාශයට පත් කරන්නේ. ඒ මිලත් බලලා සාමාන්‍යයෙන් අපි 31 වැනිදා තමයි මිල ප්‍රකාශයට පත් කරන්නේ. නමුත් මෙවර 31 ඉරිදා දිනයක් නිසා. අද හවස වෙද්දි ලෝක වෙළෙඳපොළේ තෙල් මිල කොහොමද කියලා ප්‍රකාශයට පත් වෙනවා අද දවසට අනුව. ඒ සියල්ල බලලා ඒ සම්බන්ධව තීරණයක් ගන්නවා. නමුත් ඒ සම්බන්ධව විශේෂ සාකච්ඡාවක් ආරම්භ කරලා නෑ. සාකච්ඡා වාර කිහිපයක් යන්න ඕනේ. ඒ හින්දා මේ වෙලාවේ අපිට කියන්න බෑ. නමුත් පැහැදිලිවම අඩුවීමක් වෙන්නේ නම් නෑ සමහරවිට මේ ගානටම තියෙනවාද, සුළු වැඩිවීමක් තියෙනවාද කියලා අධ්‍යනය කරන්න ඕනේ. හැබැයි පැහැදිලිවම විශාල වැඩිවීමක් නම් වෙන්නේ නැහැ. මොකද මේ සම්බන්ධයෙන් අනියත බියක් ඇති කරන්න ඕනේ නෑ."