අකුරණ මාරක රිය අනතුරින් සිව්දෙනෙකු මරුට

ශ්‍රී ලංකාවේ මහනුවර දිස්ත්‍රික්කයේ අකුරණ, කුරුගොඩ හන්දිය ආසන්නයේදී ඊයේ (ඔක්තෝබර් 19) සිදුවූ දරුණු රිය අනතුරකින් පුද්ගලයින් සිව්දෙනෙකු ජීවිතක්ෂයට පත්ව තිබේ. තවත් පුද්ගලයින් කිහිපදෙනෙකු තුවාල ලබා ඇත.

අලවතුගොඩ දෙසින් මහනුවර බලා ධාවනය වූ සිමෙන්ති ප්‍රවාහනය කරන බර ලොරි රථයක් රියදුරුගේ පාලනයෙන් ගිලිහී මහනුවර–මාතලේ ප්‍රධාන මාර්ගයේ ගමන් කරමින් තිබූ ත්‍රිරෝද රථ, යතුරුපැදි සහ වෙනත් වාහන කිහිපයක ගැටී තිබේ. අනතුරෙන් එක් යතුරුපැදියක් ගිනිගෙන ඇති අතර වාහන රැසකට හානි සිදුව ඇත.

අනතුරින් තුවාල ලැබූ පුද්ගලයින් කිහිපදෙනෙකු මහනුවර ජාතික රෝහලට ඇතුළත් කර තිබේ. ඔවුන් අතර බරපතළ තත්ත්වයේ පසුවන අයද සිටින බව වාර්තා වේ. මියගිය පුද්ගලයින් අතර කාන්තාවක්ද සිටින අතර ඔවුන් අකුරණ, අලවතුගොඩ සහ මාතලේ ප්‍රදේශවල පදිංචිකරුවන් බව සඳහන් වී තිබේ.

අනතුරට සම්බන්ධ ලොරි රථයේ රියදුරු පොලිසිය විසින් අත්අඩංගුවට ගෙන ඇති අතර, රියදුරු පවසා ඇත්තේ රථයේ තිරිංග ක්‍රියා විරහිත වූ බවයි.
කෙසේ වෙතත්, එම ප්‍රකාශය සත්‍යද යන්න සහ රියදුරුට නින්ද යාම හෝ වෙනත් කාර්මික දෝෂයක් අනතුරට හේතු වූයේද යන්න සම්බන්ධයෙන් පොලිසිය වැඩිදුර විමර්ශන සිදුකරයි. රියදුරු මත්පැන් පානය කර නොසිටි බව මූලික පරීක්ෂණවලදී අනාවරණය වී ඇති අතර මත්ද්‍රව්‍ය පරීක්ෂණයක්ද සිදු කිරීමට නියමිතව තිබුණි.

අනතුර සම්බන්ධයෙන් මෝටර් රථ ප්‍රවාහන දෙපාර්තමේන්තුවේ නිලධාරීන් විසින්ද පරීක්ෂණ සිදු කිරීමට නියමිත අතර රියදුරු අද (ඔක්තෝබර් 20) මහනුවර මහේස්ත්‍රාත් අධිකරණයට ඉදිරිපත් කිරීමට නියමිත බව වාර්තා වේ.