බොලන්ඩ්ගේ පන්දු යැවීමෙන් දකුණු අප්‍රිකාව අසීරු තත්ත්වයකට

දකුණු අප්‍රිකාව සහ ඕස්ට්‍රේලියාව අතර පැවැත්වෙන දෙවැනි ටෙස්ට් ක්‍රිකට් තරගයේ දෙවැනි දිනයේදී ස්කොට් බොලන්ඩ් තවත් කඩුලු දෙකක් දවා ගනිමින් ඕස්ට්‍රේලියාවට තරගයේ වැඩි වාසි අත්කර දුන්නේය.

වර්ෂාවෙන් බාධා එල්ල වූ දිනකදී බොලන්ඩ් ලකුණු 31කට කඩුලු 4ක් දවා ගත්තේය.
ඒ අනුව දකුණු අප්‍රිකානු කණ්ඩායම කඩුලු 5ක් දැවී ලකුණු 97ක් ලබා අසීරු තත්ත්වයක පසුවිය.

තරගය දකුණු අප්‍රිකාවේ ග්කෙබර්හාහි ශාන්ත ජෝර්ජ්ස් උද්‍යාන ක්‍රීඩාංගණයේදී පැවැත්වේ. වර්ෂාව හේතුවෙන් සඳුදා පළමු සැසි දෙකම අහිමි වූ අතර, දකුණු අප්‍රිකානු ඉනිම නැවත ආරම්භ වූයේ කඩුලු 2කට ලකුණු 20ක් ලබා සිටියදීය.

ආරම්භක පිතිකරුවන්ගෙන් පසුව පිටියට පිවිසි මාර්කස් ඇකර්මන් ලකුණු 6කට බොලන්ඩ්ගේ පන්දුවක් හමුවේ දැවී ගියේය. අනතුරුව මැතිව් බ්‍රීට්ස්කේ ලකුණු 4කට මිචෙල් ස්ටාර්ක්ගේ පන්දුවක් හමුවේ දැවී ගියේය.

කඩුලු 4ක් දැවී ලකුණු 40ක් ලෙස අසීරු තත්ත්වයක සිටි දකුණු අප්‍රිකානු ඉනිමට නායක ටෙම්බා බවුමා සහ රයන් රිකල්ටන් යම් ස්ථාවරත්වයක් ලබා දුන්හ. ඔවුන් පස්වැනි කඩුල්ල වෙනුවෙන් ලකුණු 52ක සබඳතාවක් ගොඩනැඟූහ.

කෙසේ වෙතත්, රිකල්ටන් ලකුණු 31කට දැවී ගියේ මැට් රෙන්ෂෝ පළමු ස්ලිප් ස්ථානයේ සිට රැකගත් විශිෂ්ට උඩපන්දුවක් හේතුවෙනි.
එම කඩුල්ලද බොලන්ඩ්ගේ නම ඉදිරියේ සටහන් විය.

දෙවැනි දිනය අවසන් වන විට නායක බවුමා නොදැවී ලකුණු 41ක් සහ වියාන් මල්ඩර් නොදැවී ලකුණු 2ක් ලබා සිටියහ. තෙවැනි දිනයේදී දකුණු අප්‍රිකාවට ඉනිම ගොඩනඟා ගැනීමේ අභියෝගය පැවරී තිබේ.