කොළඹ වරායේ ඩොලර් මිලියන 392ක ව්‍යාපෘතියෙන් චීන සමාගම ඉවත් වෙයි
20 Oct 2026, 11:41 AM |
News |
Views: 7
කොළඹ වරායේ ප්‍රධාන ලොජිස්ටික් මධ්‍යස්ථානයක් සංවර්ධනය කිරීම සඳහා යෝජනා කර තිබූ ඇමෙරිකානු ඩොලර් මිලියන 392ක හවුල් ව්‍යාපෘතියෙන් චීනයේ රාජ්‍ය සමාගමක් ඉවත් වී තිබේ.
ශ්‍රී ලංකා වරාය අධිකාරිය (SLPA) සඳහන් කළේ, 2023 වසරේදී ප්‍රකාශයට පත් කළ මෙම ව්‍යාපෘතිය සඳහා ඉදිරියට නොයෑමට China Merchants Port Holdings සමාගම තීරණය කර ඇති බවයි. කෙසේ වෙතත්, ව්‍යාපෘතිය අත්හැර දැමීමට තීරණය කර නොමැති අතර, එය ඉදිරියට ගෙන යාමට සැලසුම් කර තිබේ.
පවතින බාහිර තත්ත්වයන්, වාණිජ කරුණු සහ කොටස් හිමියන්ගේ අවශ්‍යතා ඇගයීමෙන් පසු මෙම තීරණය ගත් බව වරාය අධිකාරිය නිවේදනයක් නිකුත් කරමින් සඳහන් කර ඇත.
යෝජිත හවුල් ව්‍යාපෘතියේ කොටස්වලින් සියයට 70ක් චීන සමාගමට හිමිවීමට නියමිතව තිබූ අතර, ශ්‍රී ලංකා වරාය අධිකාරියට සහ මෙරට පෞද්ගලික ඉදිකිරීම් සමාගමකට සියයට 15 බැගින් හිමිවීමට නියමිතව තිබිණි.
වර්ග මීටර් 150,000ක භූමි ප්‍රමාණයක ඉදිකිරීමට සැලසුම් කර ඇති මෙම ලොජිස්ටික් මධ්‍යස්ථානය සඳහා නව ආයෝජකයකු සොයා ගැනීමට මේ වන විට වරාය අධිකාරිය කටයුතු කරමින් සිටී.
