South Asia Logistics Hub ව්‍යාපෘතියෙන් ඉවත් වීමට Access Engineering තීරණයක

ශ්‍රී ලංකාවේ ප්‍රමුඛ ඉංජිනේරු සමාගමක් වන Access Engineering PLC, South Asia Commercial and Logistics Hub ව්‍යාපෘතිය ඉදිරියට ගෙන නොයාමට තීරණය කර තිබේ.

2023 අප්‍රේල් මාසයේදී මේ සම්බන්ධයෙන් මුල්ම සමාගම් නිවේදනය නිකුත් කර තිබූ අතර, ව්‍යාපෘතිය සහ ඊට අදාළ සියලු ගිවිසුම් විධිමත් ලෙස අවසන් කිරීම සඳහා පාර්ශ්වයන් සමථ ගිවිසුමකට එළඹීමට එකඟ වී ඇත.

මෙම ව්‍යාපෘතිය සඳහා සමාගම ආයෝජනය කර ඇති රුපියල් බිලියන 1.762ක මුදලින් රුපියල් බිලියන 1.453ක් පමණ ආපසු ලබාගැනීමට අපේක්ෂා කරන බව Access Engineering සඳහන් කරයි.

South Asia Commercial and Logistics Hub Limited සමාගමේ සියයට 15ක කොටස් හිමිකාරිත්වයක් Access Engineering සතුය.

සමථ ගිවිසුම යටතේ ඇමෙරිකානු ඩොලර් මිලියන 3.286ක් හෙවත් රුපියල් බිලියන 1.087ක් පමණ ආයෝජනයට අදාළ මුදල් ආපසු ලැබීමට නියමිතය.
ඊට අමතරව බෙදාහැරීමට පවතින අරමුදල්වලින් තම කොටස ලෙස රුපියල් මිලියන 365ක් පමණ ලැබෙනු ඇතැයි සමාගම අපේක්ෂා කරයි.

ව්‍යාපෘතිය ක්‍රියාත්මක කිරීමේ පරිසරයේ සහ කාලසටහනේ සිදුවූ වෙනස්කම් මෙන්ම පාර්ශ්වයන්ගේ වාණිජමය සලකා බැලීම් ද මෙම තීරණයට බලපා ඇති බව සමාගමේ කළමනාකාර අධ්‍යක්ෂ රොහාන් ප්‍රනාන්දු සඳහන් කර තිබේ.

2026 මාර්තු 31න් අවසන් වූ මූල්‍ය වර්ෂය සඳහා වූ ඒකාබද්ධ මූල්‍ය ප්‍රකාශනවලදී මෙම ආයෝජනයෙන් තමන්ට අදාළ රුපියල් මිලියන 387ක පමණ පාඩුවක් දැනටමත් ගිණුම්ගත කර තිබේ.
ඒ අනුව, අපේක්ෂිත සමථ මුදල් සහ ආයෝජනයේ වත්මන් ගිණුම් වටිනාකම සැලකිල්ලට ගත් විට, සමූහයේ ඒකාබද්ධ මූල්‍ය ප්‍රකාශනවල තවදුරටත් සැලකිය යුතු පාඩුවක් අපේක්ෂා නොකරන බව සමාගම පවසයි.

කෙසේ වෙතත්, සමාගමේ වෙනම මූල්‍ය ප්‍රකාශනවල මෙම ආයෝජනය පිරිවැය පදනම මත සටහන් කර ඇති බැවින්, එහි මට්ටමින් රුපියල් මිලියන 310ක පමණ පාඩුවක් වාර්තා විය හැකි බව ද සඳහන් කර ඇත.

අවසන් වශයෙන් ලැබෙන මුදල විනිමය අනුපාත, අවසන් සමථ කොන්දේසි සහ අදාළ ගිණුම්කරණ සංශෝධන මත වෙනස් විය හැකි බව සමාගම වැඩිදුරටත් පෙන්වා දෙයි.