නීතිය සැමට සමානයි! NCPA මැදිහත්වීමෙන් අටමස්ථානාධිපති හිමියන්ට සහ දැරියගේ මවට එරෙහිව දැඩි අධිකරණ නියෝගයක්
09 May 2026, 10:32 AM |
News |
Views: 34
අනුරාධපුර අටමස්ථානාධිපති පූජ්ය පල්ලේගම හේමරතන හිමියන් සහ 15 හැවිරිදි දැරියකගේ මව අත්අඩංගුවට ගැනීමට අනුරාධපුර මහේස්ත්රාත් අධිකරණය වරෙන්තු නිකුත් කර තිබේ.
මෙම නඩුව මහේස්ත්රාත්වරයාගේ කාමරයේදී (Chamber) විභාගයට ගෙන ඇති අතර, විවෘත අධිකරණයේදී කැඳවා නොතිබුණි.
ප්රධාන මහේස්ත්රාත් සියපත් සසින්දු වික්රමරත්න මහතා මෙම නියෝගය ලබාදී ඇත්තේ ජාතික ළමා ආරක්ෂක අධිකාරියේ (NCPA) නීති ක්රියාත්මක කිරීමේ අධ්යක්ෂවරිය සහ නීතිඥ සජීවානි අබේරත්න මහත්මිය විසින් ඉදිරිපත් කළ කරුණු සැලකිල්ලට ගනිමිනි.
NCPA පාර්ශ්වය අධිකරණයට දැනුම් දී ඇත්තේ, සිද්ධියට සැකකරුවෙකු ලෙස සැලකෙන පූජ්ය හේමරතන හිමියන් මෙතෙක් අත්අඩංගුවට නොගැනීම සම්බන්ධයෙන් පොලිසියෙන් වාචිකව හා ලිඛිතව විමසීම් කළ බවයි. එසේම, පොලිස් පරීක්ෂණ පිළිබඳව අධිකාරිය අවධානයෙන් පසුවූ බවද සඳහන් කර ඇත.
පොලිසියෙන් සතුටුදායක ප්රතිචාරයක් නොලැබුණු බැවින්, වින්දිත දැරියට යුක්තිය ඉටු කිරීම සඳහා නඩුව අධිකරණය හමුවට ගෙන ඒමට NCPA තීරණය කළ බවද අධිකරණයට දන්වා තිබේ.
ඒ අනුව, පූජ්ය පල්ලේගම හේමරතන හිමියන් සහ දැරියගේ මව සැකකරුවන් ලෙස නම් කර ඔවුන් අත්අඩංගුවට ගැනීමට අවසර ලබාදෙන ලෙස අධිකරණයෙන් ඉල්ලා ඇත.
එමෙන්ම, පූජ්ය හේමරතන හිමියන් විදේශගත වීම වැළැක්වීම සඳහා ආගමන හා විගමන පාලකවරයාට නියෝගයක් නිකුත් කරන ලෙසද ඉල්ලීමක් කර තිබේ.
ඒ අනුව, ප්රධාන මහේස්ත්රාත්වරයා නිට්ටඹුව පොලිසියට නියෝග කර ඇත්තේ පූජ්ය හේමරතන හිමියන් සහ දැරියගේ මව අත්අඩංගුවට ගෙන සැකකරුවන් ලෙස අධිකරණයට ඉදිරිපත් කරන ලෙසයි.
තවද, පූජ්ය හේමරතන හිමියන් විදේශගත වීම තහනම් කරමින් ආගමන හා විගමන පාලකවරයාටද නියෝග නිකුත් කර ඇත.
රජයේ පාර්ශ්වය වෙනුවෙන් ජාතික ළමා ආරක්ෂක අධිකාරියේ සභාපතිනිය සහ හිටපු මහාධිකරණ විනිසුරු ඉනෝකා රණසිංහ මහත්මිය, නීති ක්රියාත්මක කිරීමේ අධ්යක්ෂ සජීවානි අබේරත්න මහත්මිය සහ සහකාර අධ්යක්ෂ හෑන්සි හලංගොඩ මහත්මිය අධිකරණයේදී කරුණු ඉදිරිපත් කළහ.
