ශ්රී ලංකන් හිටපු CEO කපිල චන්ද්රසේනගේ මරණය ගැන පශ්චාත් මරණ පරීක්ෂණය අද
09 May 2026, 12:43 PM |
News |
Views: 23
ශ්රී ලංකන් ගුවන් සමාගමේ හිටපු ප්රධාන විධායක නිලධාරී කපිල චන්ද්රසේන මහතාගේ සැකසහිත මරණය සම්බන්ධයෙන් වන පශ්චාත් මරණ පරීක්ෂණය අද (9) පස්දෙනෙකුගෙන් යුත් විශේෂ අධිකරණ වෛද්ය කමිටුවක් මගින් සිදුකිරීමට නියමිතය.
කොල්ලුපිටිය, පේද්රිරිස් පෙදෙසේ පිහිටි නිවසක තිබී ඊයේ ඔහුගේ මළ සිරුර සොයා ගැනුණු අතර, කොටුව මහේස්ත්රාත් පසන් අමරසේන මහතා නියෝග කළේ මේ පිළිබඳ පරීක්ෂණ වාර්තාවක් ලබන 12 වනදා අධිකරණයට ඉදිරිපත් කරන ලෙසයි.
එයාර් බස් ගනුදෙනුවකදී ඇමෙරිකා ඩොලර් මිලියන 02ක අල්ලසක් ලබාගැනීමේ චෝදනාව මත පසුගිය කාලසීමාව පුරා රක්ෂිත බන්ධනාගාරගතව සිටි ඒ මහතා, ඉකුත් 5 වනදා ඇප මත මුදාහැර තිබුණි.
කෙසේ වෙතත්, ඇප කොන්දේසි උල්ලංඝනය කිරීමේ චෝදනා මත ඔහු යළි අත්අඩංගුවට ගැනීමට ඉකුත් 7 වනදා අධිකරණය වරෙන්තු නිකුත් කර තිබූ පසුබිමක මෙම මරණය සිදුවීම විශේෂත්වයකි.
දූෂණ විරෝධී පරීක්ෂණ රැසක ප්රධාන සැකකරුවෙකු වූ කපිල චන්ද්රසේන මහතා ජීවිතක්ෂයට පත්වීම සම්බන්ධයෙන් කොල්ලුපිටිය පොලිසිය පුළුල් විමර්ශනයක් ආරම්භ කර තිබේ.
2013 වසරේ සිදුවූ බව කියන ප්රශ්නගත එයාර් බස් ගනුදෙනුව සම්බන්ධයෙන් චෝදනා ලැබ සිටි ඔහු, මීට දින කිහිපයකට පෙර ඇප ලබා පැමිණ සිටියද, ව්යාජ ඇපකරුවන් ඉදිරිපත් කිරීමේ චෝදනාව මත යළි වරෙන්තු ලැබ සිටි අයෙකි.
අධිකරණ වාර්තාවලට අනුව, අදාළ අල්ලස් මුදල් දේශපාලන ප්රභූන් පිරිසකට බෙදාදුන් බවට ඔහු විසින් කරන ලදැයි කියන ප්රකාශයක් සම්බන්ධයෙන් ද පසුගිය නඩු වාරයේදී දැඩි කතාබහක් ඇති විය.
මරණයට හේතුව මෙතෙක් අනාවරණය වී නොමැති අතර, අද දින පැවැත්වීමට නියමිත විශේෂ පශ්චාත් මරණ පරීක්ෂණයෙන් පසුව ඒ පිළිබඳ නිශ්චිත තොරතුරු අනාවරණය වනු ඇතැයි අපේක්ෂා කෙරේ.
