නීතිඥවරියකට තර්ජනය කළ බවට කඩුවෙල නගරාධිපතිට එරෙහිව විමර්ශන නියෝග!

කඩුවෙල නගරාධිපති රංජන් ජයලාල් මහතා විසින් බිය ගැන්වීමක් සිදු කළ බවට සහ නීතිඥවරියකගේ දේපළවලට හානි කිරීමක් සම්බන්ධයෙන් ලැබුණු පැමිණිලි පිළිබඳ විමර්ශනයක් සිදු කරන ලෙස කඩුවෙල මහේස්ත්‍රාත් අරුණ ඉන්ද්‍රජිත් බුද්ධදාස මහතා පොලීසියට නියෝග කර තිබේ.

මෙම නියෝගය කඩුවෙල, මාලඹේ සහ වැලිකඩ පොලිස් ස්ථාන වෙත ලබාදී ඇත්තේ, පැමිණිලි සම්බන්ධයෙන් නිසි විමර්ශන සිදු නොවූ බවට පැමිණිලිකාර පාර්ශ්වයේ නීතිඥවරුන් අධිකරණයට දැනුම් දීමෙන් අනතුරුවය.

පැමිණිලිකාරිය වන නීතිඥ නේත්‍රපානි ඩයස් මහත්මිය සත්ව සුභසාධන කණ්ඩායමක් සමඟ කඩුවෙල මහ නගර සභා කාර්යාලයේදී නගරාධිපතිවරයා හමුවීමට ගොස් තිබුණි. එහිදී නගරාධිපතිවරයා ඔවුන්ට තර්ජනය කර කාර්යාලයෙන් ඉවත් කළ බවට චෝදනා එල්ල වී තිබේ.

එම සිද්ධියෙන් පසු ඩයස් මහත්මිය පොලිසියට පැමිණිල්ලක් සිදු කළ අතර, පසුව මෝටර් සයිකල්වලින් පැමිණි කිහිපදෙනෙකු ඇය පසුපස පැමිණ ඇගේ දේපළවලට හානි කළ බවද සඳහන් වේ.

පැමිණිලිකාර පාර්ශ්වයේ නීතිඥවරුන් පෙන්වා දුන්නේ, එම පැමිණිල්ල සම්බන්ධයෙන් පොලිසිය මෙතෙක් ක්‍රියාමාර්ග ගෙන නොමැති බවයි.

එහෙත්, සිද්ධියෙන් දින 13කට පසුව නගරාධිපති රංජන් ජයලාල් මහතා විසින් සිදු කළ පැමිණිල්ලකට අදාළව, සම්බන්ධ පුද්ගලයන්ගෙන් ප්‍රකාශ සටහන් නොගෙනම කරුණු අධිකරණයට වාර්තා කර ඇති බවද ඔවුන් චෝදනා කළහ.

කෙසේ වෙතත්, ජයලාල් මහතා වෙනුවෙන් පෙනී සිටි නීතිඥවරුන් මෙම චෝදනා ප්‍රතික්ෂේප කරමින් ඒවා අසත්‍ය බව ප්‍රකාශ කළහ.

අදාළ පැමිණිලි සම්බන්ධයෙන් ලිඛිත කරුණු ඉදිරිපත් කරන ලෙස නියෝග කළ මහේස්ත්‍රාත්වරයා, නඩුව යළි ජූලි 3 දින කැඳවීමට නියම කළේය.