අප්‍රිකානු රටවල් තුනකට කැනඩාවෙන් සංචාරක තහනමක්

කැනඩා රජය විසින් ඊබෝලා වෛරසය රට තුළට පැතිරීම වැළැක්වීමේ පියවරක් ලෙස, අප්‍රිකානු රටවල් තුනක පදිංචිකරුවන්ට තාවකාලික සංචාරක තහනමක් පැනවීමට තීරණය කර තිබේ.

පවතින සෞඛ්‍ය අවදානම් තත්ත්වය සලකා බලමින් කොංගෝ ප්‍රජාතන්ත්‍රවාදී ජනරජය, උගන්ඩාව සහ දකුණු සුඩානය යන රටවල පදිංචිකරුවන්ට අද (බදාදා) සිට බලපැවැත්වෙන පරිදි දින 90ක කාලයක් සඳහා කැනඩාවට ඇතුළුවීම තහනම් කර ඇත.

කොංගෝ ප්‍රජාතන්ත්‍රවාදී ජනරජය තුළ 'Bundibugyo' වර්ගයේ ඊබෝලා වෛරස් ප්‍රභේදය පැතිර යාමේ ඉහළ අවදානමක් පවතින බව ලෝක සෞඛ්‍ය සංවිධානය (WHO) විසින් පසුගියදා අනතුරු ඇඟවීය.

වෛරසය කැනඩාවට ඇතුළු වීම සහ දේශීය වශයෙන් ව්‍යාප්ත වීමේ අවදානම අවම කිරීම මෙම තීරණයේ ප්‍රධාන අරමුණ බව කැනඩා බලධාරීන් පවසයි.

මෙම පියවර මගින් රටේ මහජන සෞඛ්‍ය ආරක්ෂාව තහවුරු කිරීමට කැනඩා රජය අපේක්ෂා කරන අතර, තත්ත්වය නිරන්තර අධීක්ෂණයට ලක් කරන බවත් වාර්තා වේ.