දන්සැල් සංවිධායකවරුන්ගේ අවධානයට!

වෙසක් උත්සව සමයේ පැවැත්වෙන දන්සැල්වල ආහාර සුරක්ෂිතතාව සහ මහජන සෞඛ්‍යය තහවුරු කිරීම සඳහා ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය විශේෂ වැඩපිළිවෙළක් ක්‍රියාත්මක කර තිබේ.

මෙම පරීක්ෂා කිරීම්වලදී ප්‍රධාන වශයෙන් කරුණු තුනක් කෙරෙහි විශේෂ අවධානයක් යොමු කරන බව එම සංගමයේ සංස්කාරක අනුර තිලකසිරි මහතා ප්‍රකාශ කරයි.

අවධානය යොමු කරන ප්‍රධාන අංශ:

* ආහාර සනීපාරක්ෂාව (Food Sanitation).
* ආහාර සුරක්ෂිතභාවය (Food Safety).
* කසළ කළමනාකරණය (Waste Management).

මේ සම්බන්ධයෙන් කරුණු දක්වන අනුර තිලකසිරි මහතා වැඩිදුරටත් කියා සිටියේ, දන්සැල් සංවිධානය කරන පිරිස් සිය දන්සැල අනිවාර්යයෙන්ම ලියාපදිංචි කළ යුතු බවයි.

යම් හෙයකින් තවමත් ලියාපදිංචි නොවූ දන්සැල් පවතී නම්, කඩිනමින් එම ලියාපදිංචි කටයුතු අවසන් කරන ලෙස ඔහු දන්සැල් සංවිධායකවරුන්ට දැනුම් දෙයි.

තවද, දන්සැල් සඳහා ආහාර පිළියෙළ කිරීමේදී සහ ගබඩා කිරීමේදී සෞඛ්‍යයට අහිතකර ප්ලාස්ටික්, පොලිතීන්, ලන්ච් ශීට් මෙන්ම ඉතිරි වූ ආහාර ද්‍රව්‍ය භාවිතයෙන් සම්පූර්ණයෙන්ම වළකින ලෙස මහජන සෞඛ්‍ය පරීක්ෂකවරුන්ගේ සංගමය දන්සැල් සංවිධායකවරුන්ගෙන් දැඩිව ඉල්ලා සිටියි.