ඉන්ධන මිල ඉහළ යෑම රජයේ වැරදි තීරණයක් නෙවෙයි! ජාතික ජන බලවේගයේ මන්ත්‍රී අසිත නිරෝෂන්ගෙන්

වත්මන් බලශක්ති අර්බුදය සහ ඉන්ධන මිල ඉහළ යෑම රට අභ්‍යන්තරයේ පාලකයන් ගත් තීරණ හේතුවෙන් සිදු වූ බිඳවැටීමක් නොවන බව ජාතික ජන බලවේගයේ පාර්ලිමේන්තු මන්ත්‍රී අසිත නිරෝෂන් මහතා පවසයි. ඔහු පෙන්වා දෙන්නේ මෙය ලෝකයේ පවතින යුදමය තත්ත්වය සහ පවතින ගෝලීය බලපෑම් හේතුවෙන් නිර්මාණය වූ තත්ත්වයක් බවයි.

ඉන්ධන මිල ගණන් සම්බන්ධයෙන් අදහස් දක්වමින් මන්ත්‍රීවරයා වැඩිදුරටත් කියා සිටියේ, ඉන්දියාව, සිංගප්පූරුව සහ වියට්නාමය වැනි ශක්තිමත් ආර්ථිකයන් සහිත රටවලට පවා මෙම ගෝලීය බලපෑම දැඩි ලෙස බලපා ඇති බවයි. විශේෂයෙන්ම අසල්වැසි ඉන්දියාව පසුගිය සති කිහිපය තුළදී අවස්ථා හතරකදී ඉන්ධන මිල ඉහළ දැමීමට පියවර ගත් බවත්, එරට මුදල් ඒකකය වන ඉන්දීය රුපියල වේගයෙන් අවප්‍රමාණය වූ බවත් ඔහු සිහිපත් කළේය.

ලෝක මට්ටමින් සිදුවන මෙම මිල ඉහළ යෑම පාලනය කිරීමට හෝ වැළැක්වීමට කිසිවෙකුට හැකියාවක් නොමැති බව මන්ත්‍රීවරයා අවධාරණය කළේය. එබැවින්, පවතින දුෂ්කර ආර්ථික තත්ත්වය හමුවේ රජයට සිය කටයුතු සිදු කරගෙන යෑම සඳහා යම් අවස්ථාවක් ලබා දෙන ලෙස අසිත නිරෝෂන් මහතා ජනතාවගෙන් වැඩිදුරටත් ඉල්ලා සිටියේය.