කොටුව ස්ටේෂන් එක ඉදිරිපිට විපක්ෂයේ සත්‍යග්‍රහයක්! හිටපු බුද්ධි ප්‍රධානියා වෙනුවෙන් දේශපාලන කරළිය උණුසුම් වෙයි !

පාස්කු ඉරුදින ත්‍රස්ත ප්‍රහාරය සම්බන්ධ විමර්ශන සඳහා අපරාධ පරීක්ෂණ දෙපාර්තමේන්තුව (CID) භාරයේ රඳවාගෙන සිටි, රාජ්‍ය බුද්ධි සේවයේ හිටපු ප්‍රධානී විශ්‍රාමික මේජර් ජනරාල් සුරේෂ් සලේ මහතාව අතිශය දැඩි ආරක්ෂක රැකවල් මධ්‍යයේ කොළඹ ජාතික රෝහලට ඇතුළත් කර තිබේ.

රැඳවුම් නියෝග මත පසුවන තමන්ට CIDය තුළදී විවිධ වධහිංසා පමුණුවන බවට චෝදනා කරමින් සලේ මහතා ආරම්භ කළ ආහාර වර්ජනය, රෝහල්ගත කිරීමෙන් පසුව ද ඔහු අත්හැර නොමැති බව වාර්තා වේ.

පසුගිය සිකුරාදා දින සිට කිසිදු ආහාරයක් මෙන්ම දියර වර්ග පවා ගැනීමෙන් මුළුමනින්ම වැළකී සලේ මහතා ආරම්භ කළ මෙම දැඩි ආහාර වර්ජනය හේතුවෙන් ඔහුගේ සෞඛ්‍ය තත්ත්වය අතිශය බරපතල ලෙස පිරිහී තිබුණි. ඔහුව හදිසියේම රෝහල්ගත කිරීමට ප්‍රධානතම හේතුව වූයේ ද එයයි.

රෝහල් ආරංචි මාර්ග සහ පවුලේ සාමාජිකයන් පවසන පරිදි, රෝහල්ගත කිරීමෙන් පසුව වෛද්‍යවරුන් විසින් ඔහුට ලබාදීමට උත්සාහ කළ සේලයින් (Saline) ඇතුළු බාහිර වෛද්‍ය ප්‍රතිකාර පවා ඔහු දැඩි ලෙස ප්‍රතික්ෂේප කර තිබේ.

ඊයේ (08) දිනයේදී ඔහුගේ නීතිඥවරයාට සහ පවුලේ සාමාජිකයින්ට ඔහුව හමුවීමට අවස්ථාව හිමිවූ අතර, එහිදී ද තමන් තවදුරටත් කිසිදු ආහාරයක් හෝ ජලය ලබා නොගන්නා බව සලේ මහතා ස්ථිරවම තහවුරු කර ඇත.

සුරේෂ් සලේ මහතා සිය ජීවිතය පරදුවට තබමින් මෙවැනි දැඩි වෘත්තීයමය හා මානුෂීය ක්‍රියාමාර්ගයකට එළඹීමට බලපා ඇති ප්‍රධාන ඉල්ලීම් 02ක් ඔහුගේ පාර්ශවයෙන් බලධාරීන් වෙත ඉදිරිපත් කර තිබේ,

* තමන් සම්බන්ධයෙන් දැනට ක්‍රියාත්මක වන සියලුම පරීක්ෂණ මෙහෙයවීමෙන්, අපරාධ පරීක්ෂණ දෙපාර්තමේන්තුවේ (CID) වත්මන් අධ්‍යක්ෂවරයාව වහාම ඉවත් කරන ලෙස ඉල්ලා සිටීම.

* තමන්ව දැනට රඳවා තබා ඇති ස්ථානය වෙනත් සුදුසු ආරක්ෂිත ස්ථානයක් වෙත මාරු කරන ලෙස බල කිරීම.

මේ අතර, රාජ්‍ය බුද්ධි සේවයේ හිටපු ප්‍රධානියාට එරෙහිව සිදුවන බව කියන මෙම කෲර, අමානුෂික සහ දේශපාලන පළිගැනීම්වලින් යුක්ත සැලකීම් දැඩි ලෙස හෙළා දකිමින් විපක්ෂයේ දේශපාලන පක්ෂ සහ සිවිල් සංවිධාන කිහිපයක් ඒකාබද්ධව සංවිධානය කළ විශේෂ සත්‍යග්‍රහ ව්‍යාපාරය, කොළඹ කොටුව දුම්රිය ස්ථානය ඉදිරිපිටදී තවදුරටත් අඛණ්ඩව පැවැත්වේ.

යුද්ධය දිනවීමට සහ රටේ ජාතික ආරක්ෂාව වෙනුවෙන් සුවිශේෂී සේවාවක් කළ බුද්ධි නිලධාරියෙකුට සිදුවන අසාධාරණයට එරෙහිව මෙම සත්‍යග්‍රහය ක්‍රියාත්මක වන බව විපක්ෂ ක්‍රියාකාරීහු පවසති.