IMF වාර්තාවකින් ශ්‍රී ලංකාවේ GovPay ඩිජිටල් ගෙවීම් පද්ධතියට ජාත්‍යන්තර ඇගයීමක්
16 Oct 2026, 12:11 PM |
News |
Views: 18
ශ්‍රී ලංකාවේ වේගයෙන් ව්‍යාප්ත වෙමින් පවතින ඩිජිටල් ගෙවීම් පද්ධතිය රාජ්‍ය සේවා සැපයීම වැඩිදියුණු කිරීම, මූල්‍ය සේවා සඳහා ප්‍රවේශය පුළුල් කිරීම සහ රටේ රාජ්‍ය මූල්‍ය පාලනය ශක්තිමත් කිරීම සම්බන්ධයෙන් ජාත්‍යන්තර ඇගයීමට ලක්ව තිබේ.
ජාත්‍යන්තර මූල්‍ය අරමුදල (IMF) විසින් ප්‍රකාශයට පත් කරන ලද “Shaping the Future of Asia: Opportunities and Challenges” නම් ප්‍රධාන වාර්තාවේ ශ්‍රී ලංකාවේ GovPay ඩිජිටල් ගෙවීම් වේදිකාව විශේෂයෙන් සඳහන් කර ඇත.
රාජ්‍ය ආයතනවල කටයුතු නවීකරණය කිරීම සහ රාජ්‍ය පරිපාලනයේ විනිවිදභාවය වැඩි කිරීම සඳහා මෙම පද්ධතිය වැදගත් ආදර්ශයක් ලෙස එම වාර්තාවෙන් පෙන්වා දී තිබේ.
GovPay පද්ධතිය ක්‍රියාත්මක වන්නේ LankaPay Online Payment Platform හරහාය. එමඟින් රාජ්‍ය ආයතන ශ්‍රී ලංකාවේ ජාතික ක්ෂණික ගෙවීම් ජාලය වන Common Electronic Fund Transfer Switch (CEFTS) සමඟ සම්බන්ධ කරයි.
මෙම පද්ධතිය හරහා රජයට ලැබිය යුතු ආදායම් එකතු කිරීමේ ක්‍රියාවලිය වඩාත් කාර්යක්ෂම කිරීමට හැකියාව පවතින බව IMF වාර්තාව පෙන්වා දෙයි. ඒ අනුව, මුදල් නෝට්ටු සහ කාසි භාවිතයෙන් සිදුකරන ගනුදෙනු අවම කිරීම, රාජ්‍ය ආයතන වෙත පෞද්ගලිකව පැමිණ ගෙවීම් සිදුකිරීමේ අවශ්‍යතාව අඩු කිරීම සහ පරිපාලන කටයුතු සඳහා වැයවන පිරිවැය සැලකිය යුතු ලෙස අඩු කිරීම අපේක්ෂා කෙරේ.
තවද, බැංකු ගිණුම් නොමැති පුද්ගලයන් සතුව පවතින මුදල් විධිමත් මූල්‍ය පද්ධතියට ගෙන ඒමට ද GovPay වැනි ඩිජිටල් ගෙවීම් ක්‍රම උපකාරී විය හැකි බව වාර්තාවේ සඳහන් වේ.
එමඟින් බැංකු පද්ධතිය තුළ මුදල් සංසරණය වැඩි කර බැංකු ක්ෂේත්‍රයේ ද්‍රවශීලතාව ශක්තිමත් කිරීමට ද අවස්ථාව සැලසේ.
ඒ අනුව, ශ්‍රී ලංකාවේ රාජ්‍ය සේවා ඩිජිටල්කරණය කිරීම, රජයේ ආදායම් එකතු කිරීමේ ක්‍රියාවලිය කාර්යක්ෂම කිරීම සහ ජනතාවට පහසුවෙන් ගෙවීම් සිදුකිරීමට අවස්ථාව ලබාදීම සඳහා GovPay පද්ධතියට සැලකිය යුතු දායකත්වයක් ලබාදිය හැකි බව IMF වාර්තාව මඟින් අවධාරණය කර ඇත.
