ශ්‍රී ලංකාවේ භාවිත කළ ඉන්දීය හෘද ස්ටෙන්ට් කිහිපයක් සම්බන්ධයෙන් සෞඛ්‍ය ගැටලු

ශ්‍රී ලංකාවේ භාවිත කළ ඉන්දියාවේ නිෂ්පාදිත හෘද ස්ටෙන්ට් කිහිපයක් සම්බන්ධයෙන් සෞඛ්‍ය ගැටලු මතුවීම පිළිබඳව ඉන්දීය රජයේ අවධානය යොමු වී තිබේ.

හෘද රෝගීන්ගේ රුධිර නාල අවහිරතා ඉවත් කිරීමට සහ රුධිර ගමනාගමනය පහසු කිරීමට භාවිත කරන ස්ටෙන්ට් උපකරණ කිහිපයක් සම්බන්ධයෙන් සංකූලතා වාර්තා වී ඇති බව සඳහන් වේ.
මෙම තත්ත්වය පිළිබඳව ඉන්දීය රාජ්‍ය සභා මන්ත්‍රී වෛද්‍ය අජීත් මාධව්රාඕ ගෝප්චඩේ මහතා ඉන්දීය රජයෙන් මැදිහත්වීමක් ඉල්ලා තිබේ.
ඒ අනුව, අදාළ පැමිණිල්ල ඉන්දීය සෞඛ්‍ය හා පවුල් සුබසාධන අමාත්‍යාංශය වෙත යොමු කර ඇත.

වාර්තාවලට අනුව, ශ්‍රී ලංකාවේ වෛද්‍ය උපකරණ ඇගයීමේදී ඉන්දියාවේ නිෂ්පාදිත ස්ටෙන්ට් මාදිලි තුනක් සම්බන්ධයෙන් ගැටලු හඳුනාගෙන තිබේ. ස්ටෙන්ට් නිසි ලෙස ස්ථානගත නොවීම, එය ස්ථානයෙන් ඉවත්වීම, රුධිර කැටි ඇතිවීම සහ උපකරණය නිසි ලෙස පුළුල් නොවීම වැනි සංකූලතා ඒ අතර සඳහන් වේ.

මෙම ගැටලු සැලකිල්ලට ගනිමින් අදාළ ස්ටෙන්ට් මාදිලි සම්බන්ධයෙන් අවශ්‍ය පියවර ගන්නා ලෙස ඉල්ලා තිබේ.

එමෙන්ම, වෛද්‍ය උපකරණ වෙළෙඳපොළට නිකුත් කිරීමට පෙර සිදුකරන තත්ත්ව පරීක්ෂණ දැඩි කිරීමේ අවශ්‍යතාව ද අවධාරණය කර ඇත.

තවද, මෙවැනි උපකරණ භාවිතයෙන් පසු ඇතිවන සංකූලතා නිසි ලෙස වාර්තා කිරීම, නිෂ්පාදන කාණ්ඩ හඳුනාගැනීම සහ රෝගීන්ගේ සෞඛ්‍ය තත්ත්වය අඛණ්ඩව නිරීක්ෂණය කිරීම වැදගත් බව පෙන්වා දී තිබේ.

කෙසේ වෙතත්, මෙම සිද්ධිය සම්බන්ධයෙන් ඉන්දීය රජය ගෙන ඇති අවසන් තීරණ හෝ වැඩිදුර පරීක්ෂණ පිළිබඳ තොරතුරු තවමත් පැහැදිලිව තහවුරු වී නොමැත.