ඉරාකයේ කුර්දිස්තානය සමඟ තේවලින් ඔබ්බට වෙළෙඳ සබඳතා පුළුල් කිරීමට සාකච්ඡා
16 Oct 2026, 3:58 PM |
News |
Views: 17
ඉරාකයේ කුර්දිස්තානයේ සිට ශ්‍රී ලංකාවට පැමිණි නියෝජිත පිරිසක් මෙරට සමඟ පවතින වෙළෙඳ සබඳතා තේ අපනයනයෙන් ඔබ්බට පුළුල් කරමින් වෙනත් ක්ෂේත්‍ර වෙත ව්‍යාප්ත කිරීම පිළිබඳව සාකච්ඡා කර තිබේ.
ශ්‍රී ලංකා ආර්ථික හා ආයෝජන සමුළුව 2026 සඳහා සහභාගී වීමට මෙරටට පැමිණි මෙම නියෝජිත පිරිස, ශ්‍රී ලංකාව සමඟ තවදුරටත් ව්‍යාපාරික හා ආයෝජන අවස්ථා ගවේෂණය කිරීමට කැමැත්ත පළ කර ඇති බව ලංකා වාණිජ මණ්ඩලය සඳහන් කරයි.
මෙම සාකච්ඡාවලදී ඉරාකය වෙත ශ්‍රී ලංකාව සිදුකරන සාම්ප්‍රදායික තේ අපනයනයෙන් ඔබ්බට ගොස් වෙනත් භාණ්ඩ හා සේවා ක්ෂේත්‍රවල වෙළෙඳාම පුළුල් කිරීම කෙරෙහි අවධානය යොමු වී ඇත.
ඒ අනුව ආහාර හා පාන වර්ග, කෘෂිකර්මාන්තය, අපනයනය සඳහා ආහාර නිෂ්පාදනය, උසස් අධ්‍යාපනය සහ සංචාරක කර්මාන්තය යන ක්ෂේත්‍රවල නව ව්‍යාපාරික අවස්ථා පවතින බව සාකච්ඡා කර තිබේ.
ශ්‍රී ලංකාව සහ කුර්දිස්තානය අතර ව්‍යාපාරික සබඳතා වර්ධනය කිරීම සඳහා අවශ්‍ය සම්බන්ධතා ගොඩනැගීමටත්, ආයෝජන අවස්ථා සඳහා සහාය ලබාදීමටත් ලංකා වාණිජ මණ්ඩලය කැපවී සිටින බව එහි සභාපති ක්‍රිෂාන් බාලේන්ද්‍ර මහතා ප්‍රකාශ කර ඇත.
තවද, කුර්දිස්තානයේ පවතින ව්‍යාපාරික හා ආයෝජන අවස්ථා පිළිබඳව සොයා බැලීම සඳහා එරටට පැමිණෙන ලෙස නියෝජිත පිරිස ලංකා වාණිජ මණ්ඩලයට ආරාධනා කර තිබේ.
මෙම සංචාරය තුළින් දෙපාර්ශ්වය අතර නව වාණිජ සබඳතා ගොඩනැගීමටත්, විවිධ ක්ෂේත්‍ර ඔස්සේ වෙළෙඳ හා ආයෝජන සහයෝගීතාව තවදුරටත් වර්ධනය කිරීමටත් අවස්ථා සැලසෙනු ඇතැයි අපේක්ෂා කෙරේ.
