ආසියානු ජිම්නාස්ටික් අභියෝගයේදී ශ්‍රී ලංකාවට රන් සම්මාන දෙකක්

ඉන්දුනීසියාවේ යෝග්‍යාකර්තාහිදී ඔක්තෝබර් 15 සිට 18 දක්වා පැවති පළමු ආසියානු Gym for Life Challenge තරගාවලියේදී ශ්‍රී ලංකා ජාතික මිශ්‍ර කණ්ඩායම සහ ජාතික බාලිකා කණ්ඩායම රන් සම්මාන දිනාගෙන තිබේ.

රටවල් අටක කණ්ඩායම් 30ක් සහභාගී වූ මෙම තරගාවලිය, ආසියානු ජිම්නාස්ටික් සංගමයේ අනුග්‍රහයෙන් ඉන්දුනීසියානු ජිම්නාස්ටික් සම්මේලනය සමඟ එක්ව සංවිධානය කර තිබිණි.

ශ්‍රී ලංකාව නියෝජනය කරමින් ජිම්නාස්ටික් ක්‍රීඩක ක්‍රීඩිකාවන් 89 දෙනෙකු සහභාගී වූ අතර, ඉන් 44 දෙනෙකු මිශ්‍ර කණ්ඩායමටත් 45 දෙනෙකු බාලිකා කණ්ඩායමටත් ඇතුළත් වූහ. කණ්ඩායම් දෙකම සිය ඉදිරිපත් කිරීම් වෙනුවෙන් රන් සම්මාන දිනාගැනීමට සමත් විය.

නිර්මාණශීලීත්වය, කණ්ඩායම් සහයෝගීතාව, චලන සම්බන්ධීකරණය සහ ඉදිරිපත් කිරීමේ ගුණාත්මකභාවය මෙම තරගාවලියේදී ඇගයීමට ලක්විය.

මෙම ජයග්‍රහණය ශ්‍රී ලංකාවේ ජිම්නාස්ටික් ක්‍රීඩාවේ ඉදිරි සංවර්ධනයට මෙන්ම තරුණ ක්‍රීඩක ක්‍රීඩිකාවන්ට ජාත්‍යන්තර අත්දැකීම් ලබාගැනීමට ද වැදගත් අවස්ථාවක් ලෙස සැලකේ.